დღეს, ჩინეთის სახალხო რესპუბლიკის ელჩმა საქართველოში, ჩენ ჯიანფუმ ფოთში, კოკაიას ხეივანში დამონტაჟებული სარკინიგზო-საინსპექციო რენტგენო-სკანერი საქართველოს მხარეს ოფიციალურად გადასცა. აღნიშნული მოწყობილობა ჩინეთის მთავრობის მიერ გამოყოფილი 30-მილიონიანი გრანტის ფარგლებში დამონტაჟდა და ფინანსთა სამინისტროს საჩუქრად გადეცა. ფინანსთა მინისტრმა, კახა ბაინდურაშვილმა გადმოცემის აქტს ხელი ელჩთან ერთად მოაწერა.
-„ესაა ჩინური წარმოების, საერთაშორისო სტანდარტების შესაბამისი ტექნიკა. მსოფლიოს ბევრი ქვეყანა წარმატებით სარგებლობს ამ სისტემით. ასე, რომ ტექნიკა დროში გამოცდილია„-განაცხადა ელჩმა.
ბაინდურაშვილის განცხადებით, რენტგენო-სკანერი საბაჟო ოფიცერს საშუალებას აძლევს მიმოსვლის შეუფერხებლად, ვაგონის გაუხსნელად დაათვალიეროს რკინიგზით შემოსული ნებისმიერი ტვირთი. სისტემა ავტომატურად არჩევს ერთმანეთისგან სატვირთო და სამგზავრო შემადგენლობას. სკანირებისას გამოსხივებული მაღალი რადიაციის გამო, შემოწმება მხოლოდ სატვირთო მატარებლებს ჩაუტარდება. ბაინდურაშვილის თქმით, სისტემა თავად არჩევს ერთმანეთისგან სატვირთო და სამგზავრო მატრებელს და შეცდომას სისტემა თავად გამორიცხავს.
სკანერის მომსახურების ცენტრში ექვსი საბაჟო ოფიცერი 24 საათის განმავლობაში იმუშავებს.
2009-2011 წლებში საბაჟო ინფრასტრუქტურის გაუმჯობესების მიზნით ჩინეთ-საქართველოს თანამშრომლობის ფარგლებში საქართველოს საზღვარზე რამდენიმე სპეციალური საბაჟო აღჭურვილობა დამონტაჟდა.
No comments:
Post a Comment