პუტინი აფხაზეთის პრეზიდენტობის კანდიდატებს გაერთიანებას სთავაზობს

ექსკლუზივი

ბაღაფშის დაკრძალვაზე გუშინ სოხუმში ჩასული რუსეთის პრემიერ-მინისტრი ვლადიმერ პუტინი, აფხაზეთის დე ფაქტო პრემიერ მინისტრს, სერგეი შამბასა და დე ფაქტო პრეზიდენტის მოვალეობის შემსრულებელს, ალექსანდრე ანქვაბს ცალცალკე შეხვდა. როგორც წყარო გვატყობინებს, შეხვედრა დახურულ კარს მიღმა მიმდინარეობდა. ჩვენი ინფორმაციით, პუტინმა მათ მომავალ საპრეზიდენტო არჩევნებში გაერთიანება ურჩია, რათა უფრო მარტივად გადალახონ პირველი ტური. აფხაზ პოლიტიკოსებთან პუტინის შეხვედრის ფაქტი სოხუმში მოღვაწე პოლიტოლოგმა არდა ინალიფამაც დაგვიდასტურა და აფხაზეთში მიმდინარე პოლიტიკური პროცესების შესახებაც გვესაუბრა:

- ქ-ნო არდა, რა იყო რუსეთის პრემიერის სერგეი შამბასთან და ალექსანდრე ანქვაბთან შეხვედრი მიზანი?

–ზუსტად მეც არ ვიცი, მაგრამ სავარაუდოდ, საუბარი შეეხებოდა მომავალ არჩევნებს, რომელიც აფხაზური კანონმდებლობით პრეზიდენტის გარდაცვალებიდან ზუსტად სამ თვეში უნდა ჩატარდეს. მას შეხვედრები ჰქონდა ორივე ლიდერთან ცალცალკე. ეს საგულისხმო და ცოტა უცნაურია, მაგრამ როგორც კულუარებში გავარკვიე, პუტინი ცდილობს ორივე ლიდერი ერთ გუნდად გაერთიანდეს.

–თქვენ როგორ ფიქრობთ, არჩევნებში მონაწილეობას ამ ორი კანდიდატიდან მხოლოდ ერთ–ერთი მიიღებს?

–კი არ ვფიქრობ, ასეც იქნება.

–ანუ საპრეზიდენტო კანდიდატად ვის წამოაყენებს ე.წ ერთიანი გუნდი?

–ამის პროგნოზირება წინასწარ შეუძლებელია, მაგრამ თუ გადავხედავთ მიმდინარე მოვლენებს ალბათ, მთავარი კანდიდატი სერგეი შამბა იქნება. შამბას ენდობა, როგორც რუსეთი ასევე დასავლეთიც.

–და რუსეთი ან თუნდაც დასავლეთი არ ენდობა იგივე ანქვაბს?

-ნდობით ენდობა .უბრალოდ, უფრო გამოკვეთილი პოლიტიკოსი სერგეი შამბაა, ასე ვთქვათ, უფრო მიღებული და ცნობადი ფიგურაა.

–თუ შამბა გახდა აფხაზეთის პრეზიდენტი, მაშინ ანქვაბს რა თანამდებობა ერგება?

–ის, როგორც წინა არჩევნებისას გახდა ვიცე–პრეზიდენტი, ამჟამადაც, იგივე განმეორდება. უკიდურეს შემთხვევაში, გახდება ქვეყნის პრემიერი.

-ოპოზიციონერ კანდიდატს, რაულ ხაჯინბას შანსები აქვს?

–ალბათ, ისეთივე, რაც წინა არჩევნებზე ჰქონდა. თუმცა, აფხაზეთში მუსირებს აზრი, რომ არჩევნებს აფხაზეთში იგებს არა რომელიმე პოლიტიკური ძალა, ან თუნდაც რომელიმე კანდიდატი, არამედ რუსეთი.რუსეთი,რომელსაც გააჩნია საკუთარი ინტერესები აფხაზეთთან მიმართებაში.

–და ამას რა შეიძლება მოყვეს აფხაზეთში?

–რას გულისხმობთ?

–ანუ მოსალოდნელია თუ არა რაიმე სახის არეულობა აფხაზეთში?

–ძნელია ამის წინასწარ განსაზღვრა, მაგრამ ალბათ, მოსალოდნელია. დამარცხების განცდა ალბათ, ძნელი გადასატანია, თან როცა იცი, რომ წინასწარ ყველაფერი განსაზღვრულია. იმედია, ყველაფერი მშვიდ პირობებში ჩაივლის და სამ თვეში აფხაზეთს ახალი პრეზიდენტი ეყოლება.


მალხაზ ბასილაია