„საჩუქარი სააკაშვილს“- ფოთთან რუსულმა კომპანიამ ნავთობი აღმოაჩინა

„საჩუქარი სააკაშვილს“ - ამ სათაურით რუსულმა სააგენტო „ბ-პორტმა“, რუსული საინჟინრო-ტექნოლოგიური კომპანია „სკანექსის“ მიერ შავ ზღვაში, ფოთთან ახლოს, ნავთობის საბადოს აღმოჩენის შესახებ ინფორმაცია გაავრცელა.

სააგენტოს ინფორმაციით, შავი ზღვის დაბინძურების ხარისხის შესწავლისას, კომპანიის სპეციალისტებმა შიშროვის სახელობის ოკეანოლოგიის ინსტიტუთთან ერთად, 1993-2011 წლებში გადაღებული რადიოლოკაციური გამოსახულებები გააანლიზეს.

მონაცემებზე დაყრდნობით, შავი ზღვის სამხრეთ-აღმოსავლეთ ნაწილში, 1050 მეტრის სიღრმეზე მათ ნავთობის ბუნებრივი საბადო აღმოაჩინეს. კომპანიის ინფორმაციით, დღის განმავლობაში საშუალოდ ერთიდან რვა ტონამდე, ანუ წელიწადში 400-დან 3 000 ტონამდე ნავთობი ამოიფრქვევა.

ფოთის მერი ვახტანგ ლემონჯავა აღნიშნულთან დაკავშირებით ინფორმაციას არ ფლობს. მან ჩვენთან საუბრისას განაცხადა, რომ არც ერთი რუსული კომპანია საქართველოს ტერიტორიაზე მსგავს სამუშაოებს არ ახორციელებდა. აღმოჩენის შესახებ, არაფერი იცის ფოთის საზღვაო ნავსადგურის საზოგადოებასთან ურთიერთობის სამსახურის უფროსმა, კახა გუგუჩიამაც.


ნინო თუნთია